Dagoeneko Bergara aktibatzen zikloaren azken txapan sartu gara. Euskaraldian belarriprestek duten garrantziaz ohartu eta hitz egiteko datorren astearterako (urriak 23) mintzodromo bat antolatu da, arratsaldeko 19:00etan Irizar Jauregian.

Mintzodromoaren helburutariko bat talde txikitan euskaraz gai baten inguruan hitz egitera animatzea da eta ekintza honetara belarriprestak zein ahobiziak gonbidatu nahi dira.

Mintzodromoa ahalik eta ondoen antolatzeko izena eman behar da: euskaraldiaren lokalean, Jardunen, 605712469 telefono zenbakian edo bergaraeuskaraldia@gmail.com helbide elektronikoan.

Animatu eta parte hartu!!

Udazken honetan antolatutako “Bergara aktibatzen” hitzaldi zikloari atzo eman zitzaion hasiera Kike Amonarrizen hitzaldiarekin.  Honekin jarraitzeko datorren asteazkenean, urriak 17,  Ainhoa Lasaren txanda izango da. Ainhoa EMUNeko teknikaria da eta besteak beste TELP tailerrak ematen ditu. Honako hauek euskararen erabilera soziala bultzatzeko tailerrak dira. Ainhoak datorren asteazkenean Euskaraldia ariketa soziala plano pertsonalera eramango digu eta arreta non jarri behar dugun esateaz gain, euskara gehiago erabiltzeko roletan zentratuko da.

Animatu eta gerturatu 19:00etan Irizar Jauregira hitzaldi interesgarri hau entzutera.

Eguraldia lagun, ekintza ugari izan ditugu urriko lehen aste honetan. Haur Hezkuntzako zein Lehen Hezkuntzakoekin slime egin genuen. Eskulan hori egiten trebeak dira erabiltzaileak; gustora aritu ginen arratsaldean zehar egindako slimekin jolasten. Sukaldean aritzeko tartea ere izan dugu aste honetan. Uda giroa atzean utzi ezinda, platanozko izozkiak egin genituen: txokolatea, almendrak, yogurta… horiek denak erabili genituen gure izozkiak apaintzeko. Ñam, ñam! Amaitzeko, argazki ralia egin genuen; argazki kamera eskuan, herriko kaleetan zehar ibili ginen! Aste borobila izan da!

Gogotsu ekin diete ikasturteari aurten ere Bergarako hiru ludotekakoek. Hemen daukazue bakoitzak prestatu duen urriko egitaraua ikusgai.

Animatu  lagun artean  arratsalde ahaztezinak pasatzera!

Hemen daukazue urriko euskararen bozgorailuko esaldia: “ulermen hutsak euskararen erabilerari ateak irekitzen dizkio. Eman izena eta izan zaitez BELARRIPREST”.

Aurreko astean azaldu genuen bezala urriko lehen bi asteburuetan ate irekiak izango dira Txapligun. Egun horietarako gainera egitarau polita prestatu dute bertako hezitzaileek.

Beraz, badakizu… gerturatu, probatu eta gozatu!!

Datorren asteazkenean, urriak 10, arratsaldeko 19:00etan Kike Amonarrizen hitzaldia egongo da Irizar Jauregian. Euskaraldiaren “11 egun euskaraz” ekimenaren baitan eskainiko da hitzaldi hau eta bertan, Bergararrak aktibatzeko 365 arrazoi emango dizkigu.

Ez galdu aukera eta gerturatu hitzaldi interesgarri hau entzutera!

Duela hiru aste ekin genion ikasturte berriari eta orain arteko giroa ederra izan da! Lehenengo asteko ate irekien ostean, erabiltzaile berri eta ez hain berriek aisialdi hezitzaileaz gozatzeko aukera izan dute bi astetan zehar. Eskulanak, musika jolasak, dantza, mozorroak… ugariak izan dira elkarrekin egin ditugun ekintzak.

Datorren astean urriari ongi-etorria egingo diogu eta ekintzaz beteriko programaketa prestatu dugu. Anima zaitezte eta etorri ludotekara!

Ostiral honetan irailak 28, Euskaraldiaren jolaslekua izango da Irala kalean arratsaldeko 17:00etatik aurrera. Bertan haur eta gurasoentzat jolasak egiteaz gain mural bat ere margotuko da. Belarriprest eta Ahobizi maskotak ere bertan ibiliko dira euskaraldia gertuagotik ezagutzeko aukera izateko.

Animatu eta gerturatu ostiralean!