Duela hiru aste ekin genion ikasturte berriari eta orain arteko giroa ederra izan da! Lehenengo asteko ate irekien ostean, erabiltzaile berri eta ez hain berriek aisialdi hezitzaileaz gozatzeko aukera izan dute bi astetan zehar. Eskulanak, musika jolasak, dantza, mozorroak… ugariak izan dira elkarrekin egin ditugun ekintzak.

Datorren astean urriari ongi-etorria egingo diogu eta ekintzaz beteriko programaketa prestatu dugu. Anima zaitezte eta etorri ludotekara!

Ostiral honetan irailak 28, Euskaraldiaren jolaslekua izango da Irala kalean arratsaldeko 17:00etatik aurrera. Bertan haur eta gurasoentzat jolasak egiteaz gain mural bat ere margotuko da. Belarriprest eta Ahobizi maskotak ere bertan ibiliko dira euskaraldia gertuagotik ezagutzeko aukera izateko.

Animatu eta gerturatu ostiralean!

Urriko lehen bi asteburuetan ate irekiak izango dira Txapligun. Asteburuetako aisialdi eskaintza da honako hau eta 8-12 urte bitarteko gaztetxoei zuzenduta dago. Larunbat eta igande arratsaldetan 17:00etatik 20:00ak arte egoten da zabalik eta gaztetxoek proposatutako ekintza ugari egiten dira bertan.

Ate irekiak urrian hasiko diren arren, bihartik aurrera eman daiteke izena Jardunen.

Jarduneko bazkideen urteko kuota 65 eurokoa izango da eta gainontzekoena 80 eurokoa.

Animatu ekimena gertuagotik ezagutu eta izena ematera!

Aurten ere martxan da helduen antzerki eskola. Astelehenetan izango dira saioak 20:15etatik 21:45ak arte.

Jarduneko bazkideek 17euro ordaindu beharko dituzte eta gainerakoek 20 euro.

Animatu irudimena eta gorputz adierazpena landuz giro ezin hobeaz gozatzera!

Jardun euskara elkarteak zazpigarren aldiz udako postal lehiaketa antolatu du aurten. Oraingoan ere Euskal Herritik zein kanpotik jaso dira postalak.

Nafarroa aldetik bidalitako Aittor Arantzabalen postala izan da saritua. Urkulu mendi inguruan ibili da eta Euskaraldiarekin lotutako poesia eder bat bidali digu bertatik. Sari bezala 100 euroko bonoa jaso du Elkarren gastatzeko. Zorionak!

Dagoeneko zabalik dago “11 egun euskaraz” ekimenean izena emateko epea. Horretarako Barrenkalea 10ean zabaldutako lokaletik pasa beharko duzu eskuorria betetzera edo online formularioa ( http://izenematea.euskaraldia.eus/) bete dezakezu.

Lokalaren ordutegia:

Astelehenetik-ostiralera: 17:30-19:30

Larunbatetan: 11:30-13:30

Eta zuk zein rol hartuko duzu?

Animatu ekimen eder honetan parte hartzera!

Osintxuko ludotekakoek gogotsu ekin diote kurtso berriari! Aste honetan egin duen beroari aurre egiteko, atzo igerileku puzgarriak ipini zituzten eta primeran pasatu zuten.

Hona hemen argazki batzuk.

Hemen daukazue aurtengo kurtsora begira antolatutako ekintzen eskaintza zabala. Ikusi daitekeen bezala adintarte eta gustu guztietarako ekintzak izango dira oraingoan ere.

Informazio gehiago eta izen ematea Jardunen.

Animatu!

Ezagunak egiten zaizkizu bi panpin hauek? San Martin jaietan helduen zein haurren danborradan ikusteko aukera izan genuen. Baina… zeintzuk ote ziren askok galdetuko zenioten zuen buruari. Zalantzak argitzeko, Euskaraldiko maskotak direla esan beharrean gaude, Ahobizi eta Belarriprest hain zuzen ere.

Argazkian ikusi daitekeen bezala, herritarrei informazio-saioak  eta aholkularitza eskaintzeko lokal bat alokatu da Barrekaleko 10. zenbakian. Irailaren 20an irekiko da Euskaraldian izena emateko epea eta hori aintzaki hartuta, egun horretan bertan zabalduko da lokala arratsaldeko 19:30ean.

Ekitaldi batekin emango zaio irekiera eta bertan parte hartzera gonbidatu nahi zaituztegu.

Aurtengo ikasturtean ere bueltan da Auzoko. Euskaratik hurrun bizi diren herritarra, euskarara hurbiltzeko egitasmoa da honako hau. Jende berria ezagutzeko aukera paregabea eskaintzen digu ekimen honek gainera.

Oraingo honetan berrikuntzekin dator, izan ere, asteroko taldekako dinamikez gain,  ikasturtean zehar hilabeteko iraupena izango duten hiru ikastaro antolatuko dira eta. Aurrerago emango dugu ikastaro hauei buruzko informazioa gehiago.

Animatu eta ez galdu aukera euskara ikasi edota gainerakoei irakatsiz lagunarte ederraz gozatzeko!