Konturatu orduko…abendua! Berehala joan zaigu azaroa ere, baina ez edonola. Ekintza mordo bat egin ditugu azken hilabetean zehar: Euskaraldia, abilezia jolasak, festa mexikarra, genero indarkeriaren eguna, udazkeneko landaketak, eskulanak, sukaldaritza eta askoz gehiago! Ea abendua ere horren dibertigarria den!

Hemen dauzkazue Bergarako hiru ludoteketan abendurako prestatu dituzten egitarauak ikusgai.

Animatu eta gerturatu!

Euskal Triviala bueltan da berriz ere. Euskaraz jolastu eta gozatzeko aukera bikaina da honako hau, gainera bide batez, Bergarari buruzko ezagutzak lantzeko aukera eskaintzen digu jolas honek.

Parte hartzeko oinarriak:

-Edonork parte har dezake, banaka edo taldeka (gehienez 4 kide)

-Parte hartzaile bakoitzak behin bakarrik parte har dezake

-Parte hartzaileen adinaren arabera 3 kategoria egongo dira:

.A kategoria: LH 4, 5 eta 6

.B kategoria: DBH eta Batxilergoa

.C kategoria: 18 urtetik gorakoak

-15 galderako galdetegiak bete beharko dira

-Galdetegiak bete eta kutxetan sartzeko epea abenduaren 18an bukatuko da. Erantzunak sartzeko kutxak ikastetxeetan, Udaletxean, Udal Liburutegian, Agorrosinen, Angiozarren eta Osintxun daude.

-Parte hartzaileen eta asmatzaileen artean (gutxienez 12 erantzun zuzen) sariak zozkatuko dira abenduaren 19an.

-Sariak Elkar megadendan euskarazko kultur produktuak erosteko 20 euroko bonoak izango dira. Taldean parte hartzen bada, 10 euro pertsona bakoitzeko.

Animatu eta parte hartu!

Euskarazko irakurzaletasuna bultzatzeko kanpainaren baitan, abenduaren 10etik 15era bitartean Bergarako Elkar Megadendan erosten diren euskarazko literatur liburuak merkeago erosteko aukera egongo da. Izan ere, epe honetan egindako liburuen erosketen txartela Jarduneko bulegora ekarriz gero, deskontua abonatuko da.

Helduen literaturan: %50

Gazteen literaturan: %30

Haur literaturan: %15

*Gehienez 2 liburu pertsonako.

Animatu euskaraz gozatzen jarraitzera!

Euskaraladia Bergaran!!

Guztira 3423 parte hartzaile. Horietatik 2833 ahobizi eta 590 belarriprest!

Zorionak!!!