Euskara apur bat jakinda ere euskaraz berba egiteko zailtasuna dutenak euskaraz natural berba egiten dutenekin elkartu eta berba egitea errazten duen egitasmoa da BERRIKETAN.
Eta dena diru trukerik gabe egiten da, doan.
Izena ematen dutenei libre dituzten ordu eta egunen berri galdetzen zaie eta koordinatzaileak 3-4 pertsonako taldeak antolatzen ditu eta astean ordubetez euskaraz berba egitea da helburua (ez dira klaseak, euskaraz berba egiteko taldeak baizik).
Norentzat da BERRIKETAN?
Euskaraz komunikatzeko gaitasuna izan arren, norekin hitz egin ez daukatenentzat; euskara ikasten dabilenarentzat, euskara erdi-galduta duenarentzat…
Eta euskaraz dakitenak ere partaide dira, laguntzaile modura, praktikatu nahi dutenei euskaraz hitz egiteko aukera eskainiz. Laguntzaileek ez daukate irakasle moduan jokatu beharrik, euskaraz hitz egiteko aukera eskaintzea da helburua.
AUKERA ZABALAK ESKAINTZEN DITU, ALDAERA DESBERDINEN BIDEZ:
· OHIKO taldeak: Astean behin beste berbalagun batzuekin mahai baten bueltan euskara praktikatzeko elkartzen diren taldeak.
· GURASO-LAGUN taldeak: Guraso edo tutoreentzako aldaera. Haurrak direla eta, beraien ordutegi edo zaintza beharretara egokituta dago.
· HIKA-LAGUN taldeak: Hitanoa praktikatzeko aldaera.
· BERBA-LAGUN IBILTARIAK: Astean behin beste berbalagun batzuekin elkartuta, euskara praktikatuz paseatzera joateko taldeak.
· ORTULAGUNA: Jardun euskara elkarteak Bergarako ortu komunitarioetan duen baratza euskara praktikatuz lantzea.
Hori dela eta, izena ematera animatzen zaituztegu, bai euskaraz berba egiten duzuenak (taldetxo baten laguntzaile izateko) eta baita euskara praktikatu nahi duzuenak ere; astean ordubete atsegina pasatzeko beste modu bat duzue eta!
Eta euskara-praktika hori aurrez aurre izan barik etxetik egin nahi duenak badauka beste aukera bat ere Internet bidez. Horretarako informazioa hemen topa dezakezue: www.mintzanet.net.
Oharra:
Parte hartu nahi baduzu edo informazio gehiago nahi baduzu, JARDUN euskara elkartearekin harremanetan jarri, Oxirondo plaza 2, 1. solairuara (azoka) joanda, edo telefonoz: 943 76 36 61-605712469 edo e-postaz: jardunkultura@topagunea.eus.
