AEK-k gaur jakinarazi du martxoaren 14an Irundik abiatu eta 24an Baionan amaituko den 23. Korrikako ibilbidea zehatza. 2.700 kilometro izango ditu, eta bigarren astean pasatuko da Debagoienetik, martxoaren 20an eta 23an. Kilometroak erreserbatzeko aukera, berriz, otsailaren 1ean zabalduko da.
23. Korrikaren lekukoak Bergara eta Elgeta zeharkatuko ditu martxoaren 20an, eta egun batzuk geroago, martxoaren 23an, Leintz Gatzaga, Eskoriatza, Aretxabaleta, Arrasate eta Oñati igaroko ditu.
Debagoieneko bederatzi herrietatik bi dira 23. Korrikak zeharkatuko ez dituenak: Aramaio eta Antzuola. 2017an igaro zen Korrika azkenekoz Antzuolatik, eta, 2019an Aramaiotik.
