Monthly Archives: urtarrila 2014

Juan Martin Elexpuru

Elexpuru #1 “Jardun, ixa 25 urte”

Jardun Elkarteak egindako “Eta Jardun, ze?” galderaren aurrean Juan Martin Elexpururen gogoeta. Kataian ataleko lehendabiziko kolaborazioa.

[Argazkia Goiena.net-etik CC-BY-SA]

Debaguneren aurtengo kalendarixuan agiri da erretratua:  1990eko maiatzian, zazpi lagun UNEDeko aretoan JARDUN aurkezten.  Ez daukat buru ona, baina esango neuke hor ez garela sorreran ibili giñan danok; esate baterako, oso gogotsu jardun zeban Anaje Narbaiza falta dala. Errezelua daukat, gainera, berak proposatu zebala izena.

Dozena bat urte ziren frankismo gordinetik urtenda.  Askok geure inozentzian uste giñuan nahikua izango ziela euskeriak aurrerakada haundixa egitteko. Ustiak ustel.  Irakaskuntzan gauzak hainbestian be bazoiazen, baina hedabideetan, eskolaz kanpoko jardunetan eta erabileran oso motel; atzeraka ete ginoiazen be pentsatzen giñuan batzuetan.

Arrasatekuak erakutsi zoskuen bidia. AED martxan zan ordurako. Arrasate Press be bai, Joxe Aranzabalen eskutik. Esan leike bera izan dala herri-hedabideen aita.  Joxeren laguntzaz, Berrigara sortuko dau Jardunek hurrengo urtian, 1991ean. Oker ez banago, Bergarako elkartia eta aldizkarixa izango dira Euskal Herrixan bigarrenak, Arrasateren atzetik.

Harrezkero euri asko egin dau. Adar barrixak sortu jako arbolari; zaharrak igartu be bai. Ez dira sasoirik onenak holako mobimentuendako. Baiña garbi ikusten da akulu biharra dagola oindio be, gauzak berez eta inertziaz ez dabela gure aldera egitten.

Goixan aittatu doten Anajeri pasatzen dotsat berbia. Akululari eta aintzindari ibili da urte askuan enpresa munduan euskeria indartzen. Anaje, zela ikusten dozu Jardunen papela, eta oro har euskeraren akulularixena, gaur egunian?

DANTZA IKASTOROKO KARTELA copia

Plazetako euskal dantzen ikastaroa

Urtarriletik ekainera bitartean plazetako euskal dantzen ikastaroa antolatu du Jardunek. Eskolak asteazkenetan dira arratsaldeko 19:30etatik 21:00etara bitartean Zabalotegin. Bertan, fandangoa, arin-arina, aurrezkua, banakoa eta beste zenbait dantza irakatsiko dituzte Abarka dantza taldeko irakasleek. Ikastaroaren prezioa hilean 15 eurokoa da Jarduneko bazkideentzat eta 17 eurokoa gainontzekoentzat.  Oraindik ere aukera dago eta ikastaroan parte hartu nahi izanez gero eman izena Jardunen. Animatu!

KARTELA TXIKIA

Helduen antzerki eskola

Joan zen astean eman genion hasiera helduen antzerki eskolari. Zortzi pertsonako taldea osatu da eta saioak asteazkenetan izaten dira 19:30etatik 20:30etara Zubietako eskola zaharrean. Saioak bideratzen Zurrumurru antzerki taldeko kideak ibiliko dira. Oraindik ere taldean lekua dago eta animatzen den orok ateak irekita ditu.  Interesatuak zuzenean saiora azaldu daitezke edo Jardunen izena eman. Animatu!