Bertsolaritza tresna oso garrantzitsua da euskararen erabileran, besteak beste, hiztegia, ahozkotasuna eta hizkuntza bere osotasunean lantzen baitira. Hori dela eta, Bergaran, bertsozaletasunari eta oro har bertsolaritzari bultzada bat eman nahian badira urte batzuk bertsozale elkartearen laguntzaz bertso eskolak martxan jarri genituela, haurren eta helduen (Kopla barik) bertso eskola hain zuzen ere.
Hau guztia dela eta, Jardunek ohitura eta zaletasun hauek Bergaran indartzeko asmoz haurren bertso eskola du martxan. Egitasmo hau, Gipuzkoako bertsozale elkartearekin batera bideratzen dugu eta irakasle bezala Nerea Madariaga ari da.
Bertso-eskolaren helburuak hauek dira:

– Bergaran bertsozaletasuna berpiztea.
– Bergarako bertsozaleen transmisioa ziurtatzea.
– Ahozkotasuna lantzea.

Herritarren bertsozaletasuna, bertso-giroa, bertso-grina berpiztu eta sendotu nahi ditugu. Eta honekin batera, beharrezkoa da etorkizuna sendotzea, eta horretarako haurrekin lan egin beharra dago. Haurren bertso eskolak zuzeneko transmisioa ziurtatuko liguke; haurrekin lan eginez gero, aurrerantzean gurpila bera bakarrik joango litzateke, gehiegizko energiarik eskatu gabe.

Haurren bertso eskolan osagairik garrantzitsuena taldean sortzen den giroa da. Bertso-eskola ez da ikastaro bat; aitzitik, bertsotan elkarrekin eginez ongi pasatzeko biltzen den lagun taldea da.

Lehen aipatu bezala, haurren eta helduen bertso-eskolak daude. Proiektuaren osotasuna hankamotz geratuko litzateke bietako bat kenduko bagenu. Izan ere, helduen bertso-eskolarekin herriko eta herritarren bertsozaletasuna, bertso-giroa, bertso-grina berpiztu eta sendotzen dira (herri mailako txapelketaK, bertso-truk…). Baina, giro hau lortu ondoren, beharrezkoa da etorkizuna sendotzea, eta horretarako haurrekin lan egin beharra dago. Haurren bertso-eskolak zuzeneko transmisioa ziurtatuko liguke; haurrekin lan eginez gero, aurrerantzean gurpila bera bakarrik joango litzateke, gehiegizko energiarik eskatu gabe.

KOPLA BARIK HELDUEN BERTSO-ESKOLA

Helburu nagusia bertso-eskolako kideak bat-bateko bertso-jardunean trebatzea da. Hori da bertso-eskola baten funtzio oinarrizkoenetakoa. Aurtengo ikasturtean 12 pertsonako taldea osatu da, gehientsuenak aurreko urteetatik ere bertso eskolan jardundakoak. Bertsoen munduan duten ikasbide prozesuari eta zaletasunari jarraipen bat eman behar zaio eta hori da eskola hauen helbururik nagusiena.

Baina, hau lortzeko osagairik garrantzitsuena hemen ere taldean sortzen den giroa da. Bertso-eskola ez da ikastaro bat; aitzitik, bertsotan elkarrekin eginez ongi pasatzeko biltzen den lagun talde bat da. Horregatik, ezinbestekoa da lagun-giro hori landu eta bultzatzea. Bertso-eskola ez da inoiz modu magistralean emango. Irakaslea ikasleen eskura egongo den pertsona bat izango da, dakiena erakutsiko duena, baina irakasle baino gehiago, taldearen bultzatzaile, indartzaile, animatzaile, koordinatzaile eta arduraduna izango dena.

Gaur ez da abenduak 3, baina ez du axola, euskarak 365 egun baititu!!!

Hona hemen txikupleittuek (ikasleen euskara batzordeak) euskararen egunaren inguruan egindako bideoa.

Bergarako Jardun Euskara Elkarteak Miren Amuriza eta Eider Eibarren “Kapulana bat zintzilik” saioa antolatu du.

EGUNA: Martxoak 9, asteazkena

LEKUA: IRIZAR jauregia

ORDUA: 19:00

Kapulanak Mozanbikeko emakumeen oihal koloretsuak dira; soineko moduan, haurrei lepoan eusteko, jana biltzeko edota etxeak apaintzeko baliatzen dituztenak. Hain dira erabilera anitzekoak, ezen edozer aurki baitaiteke zapi handion estalpean. Emanaldi honetan, kapulana bat zabalduko dugu eta bertan gordetako kantu, kontu eta irudiak aterako. Mozanbikeko lurrazalaren historiatik hasita, emakumeen eskuetako azal zimurrak irakurtzeraino egingo dugu bidaia. Tarte horretan kooperazioaz, nekazaritzaz, haurtzaroaz edota hizkuntzaz arituko da Miren Amuriza, Eider Eibarren ilustrazioak lagun hartuta; hala bertsoz, nola ipuinez. Ez da abentura baten kronika izango, ezta Gobernuz Kanpoko Erakunde baten hitzaldia ere; hausnarketa txikiz eta galdera handiz josiriko kontakizuna baizik. Hala nahi duenarentzat, bere gogoetak eskegitzeko oihal zabala; horixe da “Kapulana bat zintzilik”.