Monthly Archives: urtarrila 2017
HITZALDIA ZABALOTEGI ARETOAN
Jardun Euskara Elkarteak eta Bergarako Udalak elkarlanean hitzaldia antolatu dute datorren urtarrilaren 19rako Zabalotegi aretoan.
Hitzaldi hau gurasoei, hezitzaileei, irakasleei eta orokorrean hezkuntzarekin lotutako gaiekiko interesa dutenei zuzenduta dago.
Beraz, animatu! hitzaldi interesgarria izango da!
Ludotekatik ere pasatu zen Olentzero
Gabonetatik bueltan Olentzerok ludotekako arbola azpian lagatako opariak zabaldu dituzte aste honetan Oxirondoko haurrek. Ilusio handiarekin pakete guztiak banan banan zabaldu zituzten eta sorpresa asko izan ziren. Zabaldu ostean hauek probatzeari ekin zioten. Orain, jolas berriak ondo erabiltzea eta zaintzea tokatzen zaie urte askoan iraun dezaten.
Urtarrileko esaldia
Urtarrileko euskararen bozgorailua: “Ez da ezergatik, baina isiltzen duzun euskara hiltzen duzun euskara da”
“Euskara irabazteko bidean” liburu aurkezpena
Garikoitz Goikoetxearen Euskara irabazteko bidean liburuaren aurkezpena egongo da, urtarrilaren 17an, asteartea, arratsaldkeo 19:00etan Jardunen gune berrian (Kortazar parean).
Euskarak aldaketa soziala lortzeko bizi duen une historikoaren nondik norakoak jaso ditu Euskara Irabazteko Bidean liburuak.
Garikoitz Goikoetxea Berriako kazetariak euskararen munduarekin lotutako 100 laguni egindako elkarrizketak dira liburuaren oinarria, «Horietako asko bi ordutik gorako elkarrizketak dira; bakoitzari bere espezialitatean esateko duena atera nahi izan diogu» dio egileak.
Liburuak, batetik, azken hamarkadetan euskarak egindako aurrerabidearen balantzea jasotzen du. Bestetik, euskararen aldaketa soziala lortzeko zabaldu beharreko ziklo berriari buruzko gogoetak biltzen ditu. Eta, azkenik, hemendik aurrerakoei begira jartzen da.
Animatu eta zatoz!!
GABONEN OSTEAN BERGARAKO LUDOTEKAK BERRIZ ERE MARTXAN
Angiozar, Bergara eta Osintxuko ludoteketako haur eta hezitzaileek ekintza ugari egingo dituzte.Urtarrilerako programaketa aberatsa prestatu dute. Gerturatu zaitezte ludoteketara!
Zurekin Bergara Euskaldunago!
Zurekin Bergara euskaldunago! Jarduneko bazkidetza kanpainak aurrera jarraitzen du!
Oraindik ez bazara bazkide egin, ez galdu aukera!
Bazkide egiteko bi bide daude:
Barrenkale 19an ireki dugun lokaletik pasa eta esku orrietan dagoen formularioa bete edo www.jardun.eus web orrian dagoen formulario bidez.
Bazkide norbanakoak (adin mugarik gabe) zein talde, elkarte, komertzio, tabernak… egin daitezke.
Eta bazkidetza motari dagokionean aukera desberdinak egongo dira:
- Bazkidea (laguntza ekonomikoa)
- Bazkide laguntzailea (laguntza ekintzailea, Jardunek ekintzak antolatzen eta bideratzen laguntzeko bere denbora eskaintzeko prest dagoena)
- Bazkidea eta bazkide laguntzailea
Bazkide kuota 30 urtez azpikoentzat urtean 12€ izango da eta 30 urtez gorakoentzat urtean 37€.
Izan proiektu berritzaile honen parte! Gune, aurpegi, egitasmo eta ideia berriak nahi ditugu erronka handi hau egi bihurtzeko! Proiektu ilusionagarria, parte hartzailea, ekintzailea, herritarra eta bateratzailea sortzera goaz, eta bide hau zurekin egin nahi dugu! Beraz, batu elkartera, egin zaitez bazkide! Zurekin Bergara euskaldunago bat lortuko dugu!
Egin zaitez bazkide!
San Miguel#16 “euskara osasun arloan”
Urte berriak Nerea San Miguel bergarar mediku gaztearen hausnarketa ekarri digu. Jarraian duzue bere artikulua.
Irratitxik osasun mundura salto haundixa emanaz, orainguan neri tokau jat kataiakin jarraitzeko ardura. Benetan kezkatzen dostan eta askotan hausnartu izan doten galdera potolua bota doste txibierroek: Nola bizi dozu euskaldun bezela mediku lanetan aritzia? Mediku gazte eta hasiberri naizenetan, nere ikuspegitxik galdera honi buelta batzuk ematen saiatuko naiz ba!
Baina, nolakua da gaur egun euskararen egoeria osasun arloan? Esan biharra daukat, egoera gazi-gozoa dala. Hau hobeto ulertzeko, nere esperientzia kontatuko dotsuet.
Nere kasuan, 18 urte nintxuala, Euskal Herriko Unibertsitate publikoan medikuntza euskeraz ikastia erabaki neban, hortarako inungo arazorik izango ez nebala pentsauaz. Nahiko hasieratik, bihartuta, ikasgai batzuk gazteleraz jaso bihar izan nintxun eta urtiak aurrera juan ahala, gero eta gehixau tokau jaten erderaz ikastia.
Egoera honi ikasle askok aurka itxia erabaki giñuanian, kalian askotan entzun izan dogun esaldixa entzun biharra izan giñuan behin eta berriz: “Baina, zuk ze nahixau dozu, mediku euskaldun bat ala mediku on bat?” Batak bestiakin zerikusixa eukiko bazeban bezela…
Behin karrera bukatuta eta momentu askotan nere eskubidiak zapalduta izan diala ohartu eta gero, osasun arlo publikuan lanian hastian, hautu argi bat in neban hasieratik: kalidadezko osasun zerbitzu euskaldun bat ematen saiatzia; hau da, mediku ON eta EUSKALDUNA izateko lan eittia.
Izan ere, kalian, etxian edo lanian euskeraz bizitzia erabakitzen dogun bezela, medikuarenera juatian, berarekin hartu-emana gure ama hizkuntzan eittia benetan garrantzitsua dala uste dot. Guztion esku dago herritar ororen oinarrizko eskubide hau bermatzia. Beraz, danok jarraitxu biharko dogu honen alde borrokan! Eguneroko pauso txikixak emanez aldaketa haundixak lortu geinke ta!
Kataiakin jarraitzeko, Jaione Carpinterori botako jat orainguan nere galderia: zela ikusten dozu euskararen egoeria telebista publikuan?
