Monthly Archives: urtarrila 2019
Arizabaleta#27 “Euskaraldiaren ostean erabilaldia”
Oraingo honetan, Maitane Arizabaleta Astiazaranek hartu du lekukoa. Bergarako Berriketan egitasmoko koordinatzailea da eta Euskaraldiaren biharamunaz idatzi du.
Parte hartu al zenuen Euskaraldian? Ziur baietz! Eta orain jauzi egiten jarraitzeko garaia da. Ez duzula saltoa eman oraindik? Ba garaiz zabiltza! Berriketan taldeetan lagun artean euskaraz aritzeko aukera bikaina daukazu! Hasi eta segi 2019an euskara ingurukoekin euskara erabiltzen. Egin jauzi!!
Mintzapraktika egitasmoen helburua, besteak beste, erabilera sustatu eta euskara erabiltzeko aukerak eskaintzea da, euskaldunon arteko harremanak saretuz.
Dezente dira euskara praktikatu nahi dutenen motibazioak: ikasitako praktikan jartzea, galdutako ohitura berreskuratzea, euskarazko giroa eta jendea ezagutzea….
Euskalduntze bidean pertsona horren inguru hurbilak eta harreman informalek sekulako eragina dute pertsona hauek hiztun hobeak izan daitezen. Komunikazio informal hauetan lortzen baita hizkuntza bat hitz egiteko erraztasuna, segurtasuna eta ohitura finkatzea.
Honen harira, euskaraz hitz egiteko aukera guztiak aprobetxatu behar dira, hizkuntza bat ikasteko modurik onena praktikatzea baita. Akatsik gabe hitz egitea, denbora eta ariketa eskatzen duen prozesu naturala baita.
Baina euskararen normalizazioan euskararen erabilera ziurtatzea ez da bakarrik euskara praktikatzeko beharra denaren ardura, gizarte osoaren erantzukizuna baizik. Beraz guztioi dagokigu altxor hau zaindu eta ondorengoei transmititzea.
Laburtuz, etxetik kalera bi jauzitan salto egiteko aukera eskaintzen dute: etxeko bakardadetik taldeko girora lehendabizi eta, taldeko konplizitateaz, kaleko erabilerara gero, kalea euskaltegi bihurtuz…
Nerea, eta euskaltegiak zer paper jokatzen du kaleko erabileran jauzia ematerako orduan?
Gazteen antzerki eskola
DBHko gaztetxoentzat antzerki eskola martxan jarri nahi da. Antzerkia, ahozko eta gorputz adierazpena bultzatzeko tresna bikaina da. Gainera metodologia parte hartzaile bidez aurrera eramaten denez, talde lana eta elkartasuna ere lantzen dira.
Saio hauek ostiraletan 17:15etatik 18:15etara burutuko dira Zabalotegi aretoan.
Animatu sormena landu eta giro ederraz gozatzera!
Osintxuko ludotekan sukaldaritzan murgilduta
Aurreko ostiralean Osintxuko ludotekan hostopilezko palmeratxoak egiten ibili ziren.
Ikusi zelako sukaldari bikainak diren!
Debagoieneko mintzalagunak Ereindajanen
Eskualdeko berbalagun egitasmoko kideek urtarrilaren 20an, igandea, Bergarako EREINDAJAN ezagutzeko aukera paregabea izan zuten. Hurbilekoak eta sozialki justuak diren kontsumo-ereduak garatu eta indartzeko proiektua da honako hau eta Debagoiena dute lan eta eragin eremua.
Berbalagunak 11etan EREINDAJANen lokalean elkartu eta Aitziber Plazaola eta Iraitz Salegiren eskutik euren funtzionamendua, helburuak… ezagutzeko aukera ezin hobea izan zuten. Ondoren, Artatse elkartera hurbildu eta mahai baten bueltan bertako produktuak dastatu zituzten, honela bertako produktuak bultzatzeaz gain, euskara ahoan izanik harreman sare euskaldunak sortuz.
Domeketan familian gozatzen
Igande honetan “domeketan familian gozatzen” ekimenaren baitan, sormena lantzeko aukera izango da. Oxirondoko gune librean 11:30etatik 13:30ak arte haur eta gurasoentzat eskulanak egiteko aukera izango da.
Gerturatu eta animatu igande goiza giro ederrean pasatzera!
Pijama festa Txapligun
Larunbatean pijama festa egin zuten Txapligun. Bakoitzak bere pijama eraman zuen etxetik eta jolas ezberdinak egin zituzten.
Arratsalde polita pasatu zuten!
BERGARAKO LUDOTEKA| Txontxongiloak egin ditugu!
Erabiltzaile zahar zein gaztetxoenekin txontxongiloak egin genituen pasa den astean. Emaitza koloretsua eta anitza izan zen; forma, kolore eta ezaugarri askotariko txontxongiloak sortu genituen guztion artean. Eskulan erraz eta polita!
Gazte! Animatu ekintzak proposatzera!
Datorren urtarrilaren 25ean, ostirala, arratsaldeko 18:00etan Xabalote Gaztelekuan, hemendik eta uztailera arte egingo diren ekintzen inguruko proposamenak jasotzeko bilera bat egingo da.
Beraz, gerturatu bertara eta guztion artean zein ekintza egin erabakiko dugu!!
BERGARAKO LUDOTEKA| Gogotsu itzuli gara gabonetako oporren ostean!
Sorpresa ederra izan dugu gabonetako oporretatik bueltan! Zuhaitzaren azpian hainbat opari utzi zituen Olentzerok. Guztion artean opariak ireki eta jolas berriak probatu ditugu. Ederto pasatu dugu mahai jolas berriekin jolasten!
Urtarrileko bozgorailua
Urtarrileko euskararen bozgorailua: “Euskara nire ama hizkuntza ez izan arren, ibilbidea egiten ari naiz nirea izateko”
